മറവി

മറവി

#####

നിന്നെ ഞാൻ

 മറന്നുപോയിരിക്കുന്നു

ചാലിയാറിന്റെ

തീരങ്ങളിലെ

സൗഗന്ധികപ്പൂക്കളിൽ

നാമൊന്നായി

പുലർന്നിരുന്ന

ഋതുഭേതങ്ങൾ

കടത്തുതോണിയുടെ

ഇരുതുഴകളൊന്നിച്ചെറിയുമ്പോൾ

നിന്റെ കണ്ണുകളിൽ പൂവിട്ട

പ്രണയത്തിരമാലകളുടെ

വേലിയേറ്റം

നിൻ മാറിലൊട്ടിയ

പുസ്തകമാകാൻ 

കൊതിച്ചറിഞ്ഞതിനു

കളിയാക്കിച്ചിരിച്ച

താളുകൾ

ചാന്തിട്ട

കൈവിരലുകൾ

കുഞ്ഞോളങ്ങളുടെ

ചൊടികളിൽ

തലോടവേ

എന്നിൽ പിറവിയെടുത്ത

കവിതകൾ

കരയ്ക്കടുക്കവേ

തോണിക്കൊപ്പമുലഞ്ഞ

നിൻ  മുടിയിഴകളിൽനിന്നു

എന്നിലേക്കുവീണ ചെമ്പകപ്പൂ

അതിൽ പൂത്തുലഞ്ഞ

വസന്തങ്ങൾ

അവസാനകല്പടവിൽനിന്നു

തിരിഞ്ഞെന്നിലേക്കു

മിഴിയെറിയവേ

അറിയാതെ 

നിന്നിൽ വിരിഞ്ഞുപോയ

ഇനിയുമുണങ്ങാത്ത 

പുഞ്ചിരിയിതളുകൾ

തിരികെയാത്രയിൽ

നീ നോക്കിനാൽ,

മൗനങ്ങളാൽ,

കവിതജാലകങ്ങൾ

ഓരോന്നായി

തുറന്നിടുമ്പോൾ

എന്നിലേക്കു

പറന്നിറങ്ങിയ

ഋതുഘോഷയാത്രകൾ

എല്ലാം

ഞാൻ മറന്നുപോയിരിക്കുന്നു.

----------

കിനാവ്

ഇലഞ്ഞിപ്പൂമണം

ഇലഞ്ഞിപ്പുമണമുള്ള ചുംബനങ്ങൾ

***************

ഇലഞ്ഞിപ്പൂമണമുള്ള

ഓർമ്മചുംബനങ്ങളാണ്

ഇന്നെന്നെയുണർത്തിയത്

പിന്നെ 

കാടായകാടും

മേടായമേടും

ഈ കള്ളക്കർക്കിടകത്തിലെ

തുള്ളികളെ

വകഞ്ഞുമാറ്റി

ഞാൻ നടന്നു.

ബാണാസുരമലയിൽവച്ച്

എത്ര അട്ടകളാണ്

കണ്ണിൽചോരയില്ലാതെ

എന്റെ കാലിൽ

കടിച്ചുതൂങ്ങി

വീർത്തത്.

നിൻ മുടിയിൽ

ചൂടാൻമാത്രം

സുഗന്ധിപ്പൂക്കൾ

എവിടെക്കിട്ടുമെന്നായിരുന്നു

എന്റെ തേടൽ

കിട്ടിയത്

എന്നെപ്പോലെ

ഇന്നലെയുടെ

ഇലഞ്ഞൂപ്പുമണം

പേറുന്ന

ഈ കായകളാണ്.

നീയെന്നോടു പിണങ്ങരുത്

ഞാനെൻ

നടുമുറ്റത്തൊരു

മരം നട്ടിട്ടുണ്ട്.

ഇനി നീ വരുമ്പോഴേക്കും

നിന്നോടു സുഗന്ധം

കടംചോദിക്കാൻ

പൂക്കൾ വിടർന്നിട്ടുണ്ടാകും

അതുനിറയെ

അല്ല,

ഞാൻ മറന്നു

നീയെന്നാണു

കോറന്റൈനിൽനിന്നു

പുറത്തുകടക്കുക.

നാളെയിനി

വെള്ളരിമലയിലേക്കൊരു

യാത്രപോകണം

ആ തടാകക്കരയിലെങ്ങാൻ

പൂക്കൾ

അവശേഷിക്കുന്നുണ്ടാകുമോ!

ഒരപ്സരകന്യകയായ്

നീയും വരൂ,

തടാകക്കരയിലേക്ക്!

--------

കിനാവ്